दुधौली एफ.एम. संवाददाता
दुधौली, सिन्धुली — मंगलबार साँझ करिब ९ बजे देखिको अविरल वर्षाका बीच दुधौली नगरपालिका–११, मधुबनीमा भएको एक गम्भीर सर्पदंशको घटना समयमै उपचार भएपछि पीडित बालिका खतरा मुक्त भएकी छिन्।
स्थानीय जानकारी अनुसार, मधुबनीकी एक बालिका घरमा दाउरा लिन गएकी बेला ‘गोंमन’ जातको विषालु सर्पले टोकेको थियो। टोकाइपछि उनी तत्काल बेहोस भएकी बताइएको छ। वर्षाका कारण खहरे खोलामा आवागमनमा कठिनाइ भए पनि सामाजिक सहयोगी यादव कार्की र गुणराज साशंकरको पहलमा तुरुन्तै एम्बुलेन्स व्यवस्था गरी बालिकालाई सास चल्दै अस्पताल पुर्याइएको हो।
अस्पताल पुगेपछि २० भाइल एन्टिभेनम दिइएपछि बालिकाले होस पाएकी थिइन्। त्यसपछि अस्पतालका मेसु डा. सुमनसिंह कार्कीले उनलाई खतरा मुक्त घोषित गर्नुभयो।
राति करिब ११:४५ बजे वडा नं. ५ का अध्यक्ष यदुनाथ काफ्ले मार्फत दुधौली नगरपालिका अस्पताल सिर्थौलीलाई घटनाबारे जानकारी दिइएपछि तत्काल एमर्जेन्सी तयारी थालिएको अस्पतालले जनाएको छ। सिर्थौली नगर अस्पतालका मेडिकल सुपरिटेन्डेन्ट डा. सुमनसिंह कार्कीको नेतृत्वमा, तत्कालीन ड्यूटी अफिसर डा. मन्दिप अधिकारीले अफ–ड्यूटी स्वास्थ्यकर्मीहरू समेतलाई बोलाई, भेन्टिलेटरसहित आवश्यक उपकरण तयारीमा राखिएको थियो।
यस सफल उद्धार र उपचारमा संलग्न सम्पूर्ण एमर्जेन्सी टोलीलाई धन्यवाद दिँदै दुधौली नगरवासीहरूले, नगर प्रमुख र उप–प्रमुखद्वारा स्थापित स्वास्थ्य प्रणाली जनताको जीवनरक्षामा भरपर्दो र प्रभावकारी सावित भएको बताएका छन्।
श्रोत: अर्जुन कार्की, सदस्य, दुधौली नगर अस्पताल सिर्थौली
