दुधौली एफ.एम. सम्बाददाता
दुधौली, असार २३ गते ।
“कर प्रणालीको सार, लगानीको आधार” भन्ने मूल नारासहित दुधौली नगरपालिकाको सभा हलमा कर तथा राजस्व सम्बन्धी अन्तरक्रिया कार्यक्रम सम्पन्न भएको छ ।
करदाता सेवा कार्यालय सिन्धुलीको आयोजनामा सम्पन्न उक्त कार्यक्रममा कर कार्यालय सिन्धुलीका कर अधिकृत मनोज कुमार नेउपानेले कर, भ्याट र व्यवसायीहरूको जिम्मेवारी तथा उत्तरदायित्वका बारेमा जानकारी दिनुभयो । साथै चार्टर्ड एकाउन्टेन्ट मिथलेस्वोर शाहले व्यवसाय सञ्चालन गर्दा ध्यान दिनुपर्ने कर सम्बन्धी विषयहरूबारे स्पष्ट जानकारी दिनुभएको थियो ।
कार्यक्रममा दुधौली बजारका उद्योगी, व्यापारी, उद्योग वाणिज्य संघ दुधौलीका प्रतिनिधि, पत्रकार लगायत सरोकारवालाहरूको उल्लेखनीय उपस्थिति रहेको थियो ।
कार्यक्रममा सहभागी व्यवसायीहरूले कर सम्बन्धी आफ्ना केही भ्रमहरू हटाउन सफल भएको अनुभव गरेका छन् । साथै, नीति नियमको दायरा भित्र रहेर व्यवसाय व्यवस्थित ढंगले सञ्चालन गर्न सकिने स्पष्ट सन्देश यस कार्यक्रमबाट प्राप्त भएको सहभागीहरूको भनाइ छ ।
कार्यक्रमले व्यवसायी तथा सरोकारवालाहरूबीच कर प्रणालीबारे स्पष्टता ल्याउनुका साथै भविष्यमा अझ प्रभावकारी कार्यान्वयनका लागि मार्ग प्रशस्त गरेको विश्वास लिइएको छ ।सामाजिक संजालमार्फत सचेतना फैलाउन दुधौली एफ.एम.ले महत्वपूर्ण भूमिका खेलेकोमा आयोजकले आभार व्यक्त गरेका छन् ।
