दुधौली एफ.एम. सम्वाददाता
सिन्धुली, वैशाख ३१ — बागमती प्रदेश प्रहरी तालिम केन्द्र, दुधौली सिन्धुलीमा प्रहरी जवान आधारभूत तालिम (६–२०४) समूहका प्रशिक्षार्थीहरुको सक्रिय सहभागितामा एक भव्य सांस्कृतिक कार्यक्रम सम्पन्न भएको छ।
कार्यक्रमका प्रमुख अतिथि बागमती प्रदेश प्रहरी तालिम केन्द्रका समादेशक प्रहरी वरिष्ठ उपरीक्षक श्री प्रवीण पोखरेलज् रहनुभएको थियो। उहाँले दीप प्रज्वलन गरी कार्यक्रमको विधिवत् उद्घाटन गर्नु भयो।
सांस्कृतिक कार्यक्रम अन्तर्गत प्रशिक्षार्थीहरुले गीत, गजल, नृत्य, कमेडीजस्ता विभिन्न प्रस्तुतिहरू मार्फत लुकेको प्रतिभा प्रदर्शन गरेका थिए। यस्ता अतिरिक्त क्रियाकलापहरुले प्रहरी प्रशिक्षार्थीहरुको मनोबल अभिवृद्धि गर्नुका साथै अनुशासन, सकारात्मक सोच, उर्जा, जोस, जाँगर तथा संस्कृति संरक्षणमा उल्लेखनीय योगदान पुर्याउने विश्वास व्यक्त गरिएको थियो।
कार्यक्रमको समापनमा प्रमुख अतिथि पोखरेलज्यूले प्रशिक्षार्थीहरुलाई अझ सशक्त, अनुशासित र सिर्जनशील बन्न प्रेरणा दिनुहुँदै आगामी दिनमा यस्ता कार्यक्रमहरु निरन्तर आयोजना हुनुपर्नेमा जोड दिनुभयो। उहाँले शुभकामना दिँदै अझ राम्रो सिर्जनात्मक अभिव्यक्तिहरुको अपेक्षा पनि व्यक्त गर्नुभयो।
यस अवसरमा केन्द्रका सह–समादेशक तथा तालिम संयोजक प्रहरी नायव उपरीक्षक दिपेन्द्र पंजियार थारु, केन्द्रमा कार्यरत सिनियर तथा जुनियर प्रहरी अधिकृतहरु, उन्नत तालिमका प्रशिक्षार्थीहरु, बाह्य प्रशिक्षक लगायत आधारभूत तालिम (६–२०४) समूहका सम्पूर्ण प्रशिक्षार्थीहरुको उल्लेखनीय उपस्थिति रहेको थियो।
कार्यक्रममा देखिएका झलकहरुले प्रहरी प्रशिक्षण मात्रै नभई सांस्कृतिक चेतनाको विकास पनि सँगसँगै अघि बढिरहेको प्रमाणित गरेको देखिएको छ।
