दुधौली नगरमा भएको बलात्कार  घटनाको निष्पक्ष छानबिन गर्न नेपाली काङ्ग्रेस दुधौलीको माग

दुधौली एफ.एम. सम्बादाता
बैशाख १७
सिन्धुली  — नेपाली कांग्रेस, दुधौली नगर कार्य समितिले हालै दुधौली नगरपालिकाका नगर प्रमुख विरुद्ध सार्वजनिक भएका महिला अपमानजन्य अभिव्यक्तिहरूप्रति गम्भीर ध्यानाकर्षण भएको जनाएको छ। आज एक बिज्ञप्ती जारी गर्दै नेपाली कांग्रेसले यस्तो घटनालाई मानवअधिकार, सत्य, समानता र सुरक्षित समाजको मर्मविपरित भएको भन्दै तुरुन्त निष्पक्ष छानबिनको माग गरेको हो ।
नगर कार्य समितिद्वारा जारी विज्ञप्तिमा नगर प्रमुखविरुद्ध जिल्ला प्रहरी कार्यालयमा उजुरी परेपछि अनुसन्धान अघि बढेको विषयलाई लिएर सामाजिक सञ्जाल र मिडियामा आएको समाचारप्रति चासो व्यक्त गरिएको छ। नेपाली कांग्रेसले कानुनी प्रक्रिया र पीडितको गोपनीयताको सम्मान गर्दै सत्य र निष्पक्ष निर्णयका लागि सहयोग गर्ने प्रतिबद्धता जनाएको छ।
समितिका सभापति बलराम कार्की र सचिव कमान सिंह आले मगरले हस्ताक्षर गरेको विज्ञप्तिमा नागरिक, सञ्चारकर्मी तथा सरोकारवालालाई संयमित टिप्पणी गर्न र चाँडो न्याय सम्पादनमा सहयोग पु¥याउन आह्वान गरिएको छ। साथै, नेपाली कांग्रेसले सत्यतथ्य बाहिर ल्याउन सम्बन्धित निकायलाई जिम्मेवार भूमिका निर्वाह गर्न आग्रह गरेको छ।
नेपाली कांग्रेसले लोकतान्त्रिक मूल्य, मानवअधिकार र महिला सम्मानप्रति प्रतिबद्धता जनाउँदै उक्त घटनाको छानबिन निष्पक्ष, स्वतन्त्र र पारदर्शी ढङ्गले गर्नुपर्नेमा जोड दिएको छ।