दुधौली एफ.एम संवाददाता, सिन्धुली
गत चैत २० गतेदेखि सुरु भएको शिक्षक आन्दोलन दिनप्रतिदिन तीव्र बन्दै गएको छ। आन्दोलनको क्रममा देशभरका विभिन्न जिल्ला र स्थानीय तहका शिक्षकहरु राजधानी काठमाडौँमा जम्मा भइरहेका छन्। यसै क्रममा सिन्धुली जिल्लाबाट समेत उल्लेख्य संख्यामा शिक्षकहरुले सहभागीता जनाइरहेका छन्।
शिक्षक महासंघले आन्दोलन स्थलमै हाजिरी दिने व्यवस्था मिलाएपछि कयौं शिक्षकहरु हाजिरीको लागि पनि राजधानी जाने गरेका छन्। तर, आन्दोलनमा सिन्धुली जिल्लाका केही स्थानीय तहबाट उल्लेखनीय सहभागिता देखिए पनि गोलञ्जोर गाउँपालिकाबाट भने अहिलेसम्म एकजना शिक्षक पनि उपस्थित नभएको पाइएको छ।
सीएनटी समूहका एक सदस्यका अनुसार आन्दोलनको १६औँ दिनसम्म आइपुग्दा गोलञ्जोर गाउँपालिकाबाट शिक्षकहरुको सहभागिता शून्य रहँदै आएको हो।
सिन्धुलीका अन्य स्थानीय तहहरुको सहभागिता हेर्दा, कमलामाई नगरपालिकाबाट सबैभन्दा बढी ३ सय २२ जना, दुधौली नगरपालिकाबाट १ सय ३९ जना, तीनपाटन गाउँपालिकाबाट २ सय ३ जना, घ्याङ्लेखबाट ७३ जना, मरिणबाट ९७ जना, हरिहरपुरगढीबाट १ सय २८ जना, फिक्कलबाट १ सय ५ जना, र सुनकोसी गाउँपालिकाबाट १सय ५४ जना शिक्षक आन्दोलनमा सहभागी भएका छन्।
शिक्षक आन्दोलन तीव्र बन्दै गएका बेला सरकारले आन्दोलनप्रति उपेक्षा देखाएको भन्दै आन्दोलन आयोजक समूहले सबै शिक्षकलाई अनिवार्य रूपमा राजधानीमा उपस्थित भई ऐक्यबद्धता जनाउन आग्रह गरेको छ।
