दुधौली एफ.एम सम्बाददाता
सिन्धुलीको दुधौली नगरपालिकामा पछिल्लो समय ट्राफिक प्रहरीको सक्रियता उल्लेखनीय रूपमा बढेको छ। नगरका विभिन्न स्थानहरूमा सवारी दुर्घटना न्यूनीकरण गर्न तथा यात्रु मैत्री वातावरण निर्माणका लागि ट्राफिक प्रहरीले सघन रूपमा अभियान सञ्चालन गरेपछि दुर्घटनामा क्रमिक रूपमा कमी आएको देखिएको छ।
इलाका प्रहरी कार्यालय दुधौलीका इन्स्पेक्टर सिमोन धितालको नेतृत्वमा ट्राफिक प्रहरी सहायक निरीक्षक उपेन्द्र महत्त्व र हवल्दार हरेराम खतिवडाको सक्रियताका कारण नगरपालिकामा दुर्घटना कम भएको स्थानीयहरू बताउँछन्। विशेष गरी मदन भण्डारी वैकल्पिक राजमार्गमा हुने सवारी दुर्घटनालाई ध्यानमा राख्दै प्रहरीले सवारी चेकजाँचलाई थप कडाइ गरेको छ।
इलाका प्रहरी कार्यालय डकाहाको निर्देशन अनुसार ट्राफिक प्रहरीले दुधौली नगरका विभिन्न स्थानहरूमा नियमित तथा आकस्मिक चेकजाँच गर्दै आएको छ। प्रहरी स्रोतका अनुसार अब कुनै पनि प्रकारको सवारी नियम उल्लंघनलाई नजरअन्दाज नगरिने र सबैलाई कारबाहीको दायरामा ल्याइने नीति अपनाइएको छ। ट्राफिक हवल्दार खतिवडाका अनुसार सवारी चेकजाँच नागरिक सुरक्षाका लागि सञ्चालन गरिँदै आएको छ।
दुधौली नगरका विभिन्न सडकखण्डमा ट्राफिक प्रहरीको सक्रियता देखेर स्थानीयवासी खुसी व्यक्त गर्दैछन्। उद्योग वाणिज्य संघ दुधौलीका अध्यक्ष बृजनारायण शाहका अनुसार ट्राफिक प्रहरीले मद्यपान गरेर सवारी चलाउने, अति तीव्र गतिमा गाडी हुइँक्याउने, र अनधिकृत सवारी सञ्चालन गर्ने व्यक्तिहरूमाथि कारबाही गर्दा दुर्घटना कम हुन मदत पुगेको छ। स्थानीय समाजसेवी पूर्णबहादुर विष्ट राजनले चेकजाँच अभियान प्रभावकारी बनेको बताए।
केही स्थानीयले चेकजाँचको कठोरतालाई लिएर असन्तोष व्यक्त गरे पनि नगरपालिकाका वडा नम्बर ८ का अध्यक्ष केशव बरालका अनुसार ट्राफिक प्रहरीको सक्रियताले आम जनतामा सकारात्मक प्रभाव पारिरहेको छ।
दुधौली नगरपालिकामा ट्राफिक प्रहरीको सक्रियता अझ प्रभावकारी हुँदै गएको छ, जसले गर्दा यात्रुहरू थप सुरक्षित महसुस गरिरहेका छन्। यसरी नै निरन्तरता दिए दुर्घटना शून्यमा झार्ने लक्ष्य हासिल गर्न सकिने विश्वास गरिएको छ।
