दुधौली एफएम संवाददाता
दुधौली / उदयपुरको कटारीमा भोलि पुस १३ गते श्रम संस्कृति पार्टीका सभापति तथा धरान उपमहानगरपालिकाका प्रमुख हर्क साङ्पाङले बृहत् आम भेलालाई सम्बोधन गर्नु हुने भएको छ। कटारीमा आयोजना हुने उक्त आम भेलामा पार्टी संगठन विस्तार, ‘हर्क पथ’को अवधारणा जनतामाझ प्रस्तुत गर्ने तथा आगामी फागुन २१ गते हुने निर्वाचनको माहोल सिर्जना गर्ने उद्देश्य रहेको जनाइएको छ।
श्रम संस्कृति पार्टी कटारी नगर संयोजक पूर्णमानसिंह राईका अनुसार पार्टीको नीति, सिद्धान्त र कार्यक्रम जनस्तरसम्म पुर्याउने उद्देश्यले आम भेला आयोजना गरिएको हो। भेलामा पार्टी सभापति साङ्पाङले श्रममा आधारित राजनीति, आत्मनिर्भर अर्थतन्त्र र सुशासनका विषयमा आफ्ना धारणा राख्ने कार्यक्रम रहेको छ।
संयोजक राईले पुराना राजनीतिक दलहरूले जनअपेक्षाअनुसार काम गर्न नसकेको भन्दै नयाँ सोच र श्रमिक वर्गमा आधारित राजनीतिक शक्तिले मात्रै देश निर्माण सम्भव हुने विश्वास व्यक्त गर्नुभयो। उहाँका अनुसार श्रम संस्कृति पार्टीले श्रमिक, किसान र आम नागरिकको हकहितलाई केन्द्रमा राखेर राजनीति अघि बढाउने लक्ष्य लिएको छ।
भेलाकै अवसरमा श्रम संस्कृति पार्टी कटारी नगर समितिको गठन गर्ने तयारीसमेत रहेको जनाइएको छ। पार्टी सभापति हर्क साङ्पाङको उपस्थितिमा नगरस्तरीय संगठनलाई पूर्णता दिँदै आगामी निर्वाचनका लागि सक्रिय भूमिका खेल्ने योजना बनाइएको संयोजक राईले जानकारी दिनुभयो।
आम भेलामा कटारी नगरसहित आसपासका क्षेत्रबाट उल्लेख्य संख्यामा नागरिकहरूको सहभागिता रहने अपेक्षा गरिएको छ।
