दुधौली एफएम सम्बाददाता
दुधौली / दुधौली नगरपालिकाको माथिल्लो भेगमा पर्ने वडा नं. १२, १३ र १४ का स्थानीयहरू केही दिन देखि परेको निरन्तर परेको वर्षातका कारण आवतजावतमा समस्या खेपिरहेका छन् । पछिल्ला केही दिनदेखिको अविरल वर्षाले सडक चिप्लो र अप्ठ्यारो बनेपछि दैनिक आवतजावत तथा उपभोग्य सामान वोसार पसार गर्न स्थानीयले सास्ती भोग्नुपरेको हो ।
नेपालीहरूको महान् चाड दशैँ नजिकिँदै गर्दा माथिल्लो भेगका स्थानीयहरूलाई अझै बढी कठिनाइ परेको छ । दुधौली बजार उनीहरूको मुख्य केन्द्र भएकाले त्यहाँबाट दैनिक उपभोग्य सामान लैजानु र आफ्नै उत्पादन बिक्री गर्नु पर्ने बाध्यता रहेको छ । तर, सडकको खराब अवस्थाका कारण बजार आउन त केही हद सम्म सम्भव भए पनि फर्कदा भारी बोकेको सवारीसाधन बाटोमै चिप्लेर रोकिनु वा बीच बाटोमै अड्किनु पर्ने अवस्था आएको स्थानीयको गुनासो छ ।
दुधौली–१४ का स्थानीय हिरा बहादुर तामाङले भने, “निर्वाचन आउँदा नेताहरू यही सडक देखाएर भोट माग्छन् । हामी पनि सडक बन्ने भयो भनेर आशा राखेर भोट हाल्छौँ । तर चुनाव सकिएपछि नेताहरू हराउँछन् । हाम्रो पीडा सुनिदिने कोही छैन ।”
स्थानीयवासीहरूको भनाइअनुसार, वर्षातमा हिलोमैलो र चिप्लो, हिउँदमा धुलाम्मे हुने सडकका कारण दैनिक जीवन नै प्रभावित भएको छ । “दशैं आउनै लाग्यो, बजार आउनैपर्छ, तर बजारबाट फर्केर कसरी घर पुग्ने भन्ने चिन्ता छ,” दुधौली–१३ का एक स्थानीयले बताएका छन् ।
स्थानीयहरूले संघ, प्रदेश र स्थानीय सरकार सबैतर्फबाट उपेक्षित भएको महसुस गरेको बताएका छन् । उनीहरूको आरोप छ कि स्थानीय सरकारले समेत उनीहरूलाई ‘तेस्रो दर्जाको’ नागरिकझैँ व्यवहार गर्दै आएको छ ।
यसरी सडक समस्या लामो समयदेखि भइरहे पनि सम्बोधन हुन नसक्दा दुधौलीका माथिल्ला वडाका बासिन्दा वर्षेनी पीडामा बस्न बाध्य भएका छन् । दशैं जस्ता चाडपर्वमा अझै बढी समस्या देखिनु प्राकृतिक विपत्ति मात्र नभई योजनागत बेवास्ता र राजनीतिक उदासीनताको परिणाम भएको स्थानीयहरूको धारणा छ ।
