दुधौली एफ.एम. सम्बाददाता
दुधौली/लामो समयदेखि गर्मि बढेर जीवन कष्टकर बन्दै गएपछि दुधौलीको डकाहामा भ्यागुताको विवाह गरिएको छ । पानीको पुकार गर्दै दुधौली नगरपालिका वडा नं. ४ डकाहाका स्थानीयले आज एक जोडी भ्यागुताको विवाह गरिदिएका हुन ।
उनीहरुले भ्याुगताको विवाह गरेमा इन्द्र देवता खुशी भई पानी पारिदिने जनविश्वास रहेका कारण भ्यागुताको विवाह गराईदिएको बताएका छन । साउनको दोश्रो साता बित्नै लाग्दा पनि पानी नपर्दा दुधौलीका किसानहरुले धानको रोपाई गर्न पाएका छैनन् भने धेरै किसानहरुको धानको बेर्ना नै पर्न थालेको छ । यसै गरी अत्यधिक गर्मि बढेसँगै खेतिबाली, बोटविरुवा, पानीका मुहान सुक्न थालेका कारण पानीको माग गर्दै स्थानीयले भ्यागुताको विवाह बैदिक विधिपूर्वक गराएका छन । गत बर्ष पनि लामो समय पानी नपरी खडेरी परे पछि भ्यागुताको बिहे गरेको र बिहे गरेको केहि दिन मै पानी परेको कारण पनि यो पटक पनि बिहे गरिदिएको उपेन्द्र महत्तोले बताउनु भयो ।
ब्राह्मण सहित करीब ३० जना जन्ती लगि भ्यागुतालाई बेहुला बेहुली जस्तै सिंगारि विवाह गराएका हुन । विवाह सकिएपछि एकजोडी कुमार केटाले विवाहित भ्यागुतालाई कमला खोलामा डोलीमा बोकेर पु¥याएर बगिरहेको पानीमा छोडिदिएका थिए ।
भ्यागुतालाई सिँगारपटार गरी डोलीमा चढाई ब्राह्मणहरूले वैदिकमन्त्र पाठ तथा रुद्रीपूजा गरी धुमधामसँग भ्यागुताको विवाह गरिएको हो । ध्यू, चामल, जौँ, तिलको होमादी गरिएको स्थानीयले बताएका छन ।
जिल्लाकै अत्यधिक गर्मि हुने कमलाखोंच क्षेत्रको दुधौलीमा एकसातादेखि ३२ देखि ४२ डिग्री सेल्सियसको हाराहारीमा तापक्रम बढेको गुगलमा देखिएको छ ।
