दुधौली एफएम सम्बादाता
सिन्धुली / लागुऔषध नियन्त्रणदेखि फरार अभियुक्त पक्राउ, स्मार्ट कन्ट्रोल रुम स्थापनामा सहजीकरण तथा समुदायसँगको प्रभावकारी सहकार्यमार्फत उल्लेखनीय कार्यसम्पादन गरेका इलाका प्रहरी कार्यालय भिमानका प्रमुख प्रहरी निरीक्षक राजु के.सी. (खत्री) जेठ महिनाको ‘सर्वोत्कृष्ट प्रहरी (Best Police of the Month)’ घोषित हुनु भएको छ।
जिल्ला प्रहरी कार्यालय सिन्धुलीले ‘महिनाको उत्कृष्ट प्रहरी छनोट कार्यविधि, २०७९’ बमोजिम प्रहरी निरीक्षक के.सी.लाई २०८३ साल जेठ महिनाको सर्वोत्कृष्ट प्रहरी घोषणा गर्दै सम्मानित गरेको हो। उत्कृष्ट कार्यसम्पादनको कदर गर्दै जिल्ला प्रहरी कार्यालयका प्रमुख प्रहरी उपरीक्षक रबिन्द्र बहादुर सिंहले उहाँलाई सम्मान तथा प्रशंसापत्र प्रदान गर्नु भएको हो ।
प्रहरी निरीक्षक के.सी.ले इलाका प्रहरी कार्यालय भिमानको नेतृत्व सम्हाल्दै सुरक्षा व्यवस्थापनलाई प्रभावकारी बनाउनुका साथै स्थानीय तहहरूसँग समन्वय गरी जिल्ला प्रहरी कार्यालय सिन्धुलीमा स्मार्ट कन्ट्रोल रुम स्थापना प्रक्रियामा महत्वपूर्ण भूमिका खेल्नु भएको थियो ।
त्यसैगरी भिमान चेकपोष्टमा सञ्चालन गरिएको विशेष अपरेसन अभियानका क्रममा १७०.०६ ग्राम खैरो हेरोइनसहित १८ जनालाई पक्राउ गरी कानुनी दायरामा ल्याउन इलाका प्रमुख केसि सफल हुनु भएको थियो । विभिन्न आपराधिक घटनामा संलग्न भई फरार रहेका अभियुक्त, कारागारबाट फरार भएका व्यक्ति तथा इन्टरपोलको रेड कर्नर नोटिस जारी भएका व्यक्तिहरूलाई समेत खोजी तथा पक्राउ गर्न उहाँले प्रभावकारी भूमिका निर्वाह गर्नु भएको जिल्ला प्रहरी कार्यालय सिन्धुलीले जनाएको छ।
राजमार्गमा यात्रुवाहक तथा मालवाहक सवारीसाधनको निर्वाध आवागमनमा अवरोध पुर्याउने गतिविधि नियन्त्रण तथा शान्ति सुरक्षा कायम गर्न समेत उहाँले सक्रिय भूमिका खेल्दै आउनु भएको छ । साथै समुदाय–प्रहरी साझेदारी कार्यक्रमअन्तर्गत नागरिक सुनुवाइ, सचेतनामूलक अभियान तथा अपराध रोकथामसम्बन्धी विभिन्न कार्यक्रम सञ्चालन गरी नागरिक र प्रहरीबीचको सम्बन्ध सुदृढ बनाउन योगदान पुर्याएका कारण सम्मान गरिएको जिल्ला प्रहरी कार्यालय सिन्धुलीले जनाएको छ।
जिल्ला प्रहरी कार्यालय सिन्धुलीका अनुसार प्रहरी निरीक्षक के.सी.ले सम्पादन गर्नु भएको कार्यको उच्च मूल्यांकन गर्दै उहाँलाई सर्वोत्कृष्ट प्रहरी घोषणा गरिएको हो। यस सम्मानले अन्य प्रहरी कर्मचारीलाई समेत उत्कृष्ट कार्यसम्पादनका लागि प्रेरणा मिल्ने विश्वास गरिएको छ।
सम्मान ग्रहणपछि प्रहरी निरीक्षक के.सी.लाई आगामी दिनमा पनि व्यावसायिक दक्षता, अनुशासन र जनसेवामुखी कार्यलाई निरन्तरता दिन शुभकामना व्यक्त गरिएको छ।
