दुधौली एफएम संवाददाता
असार ६
सिन्धुली, सिन्धुलीको दुधौली नगरपालिका–९ स्थित तावा खोला पुल नजिक प्रहरीले खैरो हिरोइन जस्तो देखिने पदार्थसहित दुई युवकलाई पक्राउ गरेको छ। नियमित सवारी जाँचका क्रममा बरामद गरिएको उक्त पदार्थको तौल प्लास्टिकबाहेक ७२० मिलिग्राम रहेको प्रहरीले जनाएको छ।
प्रहरी चौकी दुधौलीबाट प्रहरी वरिष्ठ नायब निरीक्षक जालन्धर बरालको कमाण्डमा खटिएको टोलीले शुक्रबार साँझ करिब ५ः३० बजे ट्राफिक प्रहरीसहित चेकप्वाइन्ट स्थापना गरी सवारी साधन जाँच गरिरहेको अवस्थामा सिरहाको मिर्चैयाबाट दुधौलीतर्फ आउँदै गरेको स.७ प.७३६४ नम्बरको मोटरसाइकललाई रोकेको थियो।
जाँचका क्रममा मोटरसाइकल चालक दुधौली नगरपालिका–९ निवासी २७ वर्षीय प्रमोद साह र पछाडि सवार सोही स्थानका २० वर्षीय उमेश रुचाललाई खानतलासी पुर्जी दिई शरीर तथा सामान जाँच गर्दा प्रमोद साहको साथबाट कालो प्लास्टिकमा प्याक गरिएका सात वटा पोका फेला परेको प्रहरीले जनाएको छ।
उक्त पोका खोली परीक्षण गर्दा खैरो हिरोइन जस्तो देखिने पदार्थ फेला परेको थियो। मान्यता प्राप्त तराजुबाट तौल गर्दा प्लास्टिकसहित १ ग्राम ४२० मिलिग्राम र प्लास्टिकबाहेक ७२० मिलिग्राम पदार्थ रहेको प्रहरीको भनाइ छ।
खानतलासीका क्रममा सोही पर्सभित्रबाट एक हजार दरका सात थान नोट गरी नगद ७ हजार रुपैयाँ पनि बरामद गरिएको प्रहरीले जनाएको छ।
बरामद गरिएको पदार्थ र नगद रकम रितपूर्वक नियन्त्रणमा लिई प्रारम्भिक अनुसन्धानपछि दुवै जनालाई पक्राउ गरिएको जिल्ला प्रहरी कार्यालय सिन्धुलीले जनाएको छ। घटनाबारे थप अनुसन्धान भइरहेको प्रहरीले जानकारी दिएको छ।
