दुधौली एफ.एम. सम्वाददाता
दुधौली, सिन्धुली / दुधौली नगरपालिका–१३ स्थित कर्था खोलामा निर्माणाधीन बादरेघाट पुल सम्झौता अवधिभित्रै सम्पन्न गर्न दुधौली नगरपालिकाका कार्यवाहक नगरप्रमुख चन्द्रकिशोर थारुले निर्माण कम्पनीलाई कडा निर्देशन दिएका छन्।
लगातार दुई दिनदेखिको अविरल वर्षापछि ढलानको चरणमा पुगेको पुलको केही संरचना भत्किएपछि कार्यवाहक नगरप्रमुख थारुले निर्माण कार्यमा भएको ढिलासुस्ती र लापरबाहीप्रति असन्तुष्टि जनाउँदै समयमै काम सम्पन्न गर्न चेतावनी दिएका हुन्। पुलको संरचना क्षतिग्रस्त हुँदा स्थानीय नागरिकको आवतजावतमा समस्या उत्पन्न भएको छ भने लाखौं रुपैयाँ बराबरको क्षति भएको अनुमान गरिएको छ।
नगरप्रमुख थारुले निर्माण कम्पनीले गुणस्तर र समयसीमाप्रति गम्भीर बन्नुपर्ने उल्लेख गर्दै अबको काम थप जिम्मेवारीका साथ अघि बढाउन निर्देशन दिएका छन्। ग्रामीण क्षेत्रका नागरिकका लागि अत्यन्त महत्वपूर्ण मानिएको उक्त पुल निर्माण सम्पन्न भएपछि स्थानीयको यातायात सहज हुने, बजार, शिक्षा तथा स्वास्थ्य सेवामा पहुँच विस्तार हुने अपेक्षा गरिएको थियो। तर वर्षाका कारण निर्माणाधीन संरचना भत्किएपछि स्थानीयवासी चिन्तित बनेका छन्।
संघीय बजेट अन्तर्गत निर्माण भइरहेको पुलमा ६० प्रतिशत दुधौली नगरपालिकाको र ४० प्रतिशत संघीय सरकारको लगानी रहेको छ। दुधौली नगरपालिकाले रु. ४ करोड १६ लाख ८४ हजार ८ सय ५६ लागतमा साही–बीएमएम जेभी बरथहवा निर्माण कम्पनीसँग २०८१ असार १९ गते निर्माण सम्झौता गरेको थियो। सम्झौताअनुसार पुल २०८३ असार १५ गतेभित्र सम्पन्न गरिसक्नुपर्नेछ।
हालसम्म पुल निर्माणको करिब ६० प्रतिशत काम सम्पन्न भएको जनाइएको छ। तर निर्माण कार्य सुस्त गतिमा अघि बढिरहेको भन्दै स्थानीयवासीले यसअघि नै असन्तुष्टि जनाउँदै आएका थिए। वर्षायाम सुरु हुनुअघि नै पुल निर्माण सम्पन्न गर्नुपर्ने माग भइरहेका बेला पुलको भाग भत्किनुले निर्माण गुणस्तर र अनुगमनमाथि प्रश्न उठाएको स्थानीयको भनाइ छ।
