दुधौली एफ.एम.सम्वाददाता
दुधौली / सिन्धुली जिल्ला दुधौली नगरपालिकाकी सफल उद्यमी रेवती गुरुङ ‘कोक्रोमा’ ब्रान्डमार्फत अन्तर्राष्ट्रिय बजारमा पहिचान बनाउन सफल हुनु भएको छ । उहालाई OnlineKhabar ले सार्वजनिक गरेको ‘५० प्रभावशाली महिला २०२६’ को सूचीमा समावेश गरेको हो ।
दुधौली नगरपालिका–९ खिरियानीमा जन्मनु भएको गुरुङले नमुना मावि (साबिक उच्च मावि लदाभिर) बाट एसएलसी उत्तीर्ण गर्नु भएको हो । सानैदेखि जेहन्दार विद्यार्थीका रूपमा चिनिने उहा खेलकुदमा पनि उत्तिकै सक्रिय हुनु हुन्थ्यो। उच्च शिक्षाका लागि धरान पुगेर स्नातक पूरा गरेपछि उहाको जीवनका विभिन्न उतारचढावका बीच आफ्नो लक्ष्यबाट विचलित नभई अघि बढी रहनु भयो ।
करिब दुई लाख रुपैयाँको सानो लगानीबाट सुरु गरिएको उहाँको व्यवसाय आज ‘कोक्रोमा’ नामक स्थापित ब्रान्डका रूपमा विकसित भएको छ। प्रारम्भमा ‘कोक्रो’ (झोलुङ्गो) उत्पादन गर्ने उद्देश्यले नाम राखिए पनि हाल कम्पनीले अर्गानिक तथा सुती कपडाबाट बनेका बालबालिकाका लुगा, टोपी, पन्जा, मोजा, सिरानी लगायतका सामग्री उत्पादन गर्दै आएको छ।
स्थानीय बजारलाई लक्षित गरेर सुरु गरिएको व्यवसाय अहिले अन्तर्राष्ट्रिय बजारसम्म विस्तार भइसकेको छ। उहाको उत्पादनहरू अमेरिका, अस्ट्रेलिया, ताइवान लगायतका देशहरूमा निर्यात हुँदै आएका छन्।
संघर्षपूर्ण यात्रा र सफलताको कथा
विवाहपछि काठमाडौं आउनु भएको गुरुङका लागि सुरुवाती दिनहरू निकै चुनौतीपूर्ण थिए। मास्टर्स पढ्ने तीव्र इच्छा हुँदाहुँदै पनि पारिवारिक अवरोधका बीच उहाले अनेक कठिनाइ झेल्दै पढाइ पूरा गर्नु भयो । पद्मकन्या क्याम्पसमा अध्ययनका क्रममा उहाले होस्टेलमा बस्नका लागि आफूलाई अविवाहित भनेर चिनाउनुपरेको अनुभव पनि सुनाउँनु भयो।
आज उहाँ एकल आमाका रूपमा आफ्नो १५ वर्षीय छोरासँगै संघर्षपूर्ण जीवन पार गर्दै सफल उद्यमीको रूपमा स्थापित हुनु भएको छ ।
‘५० प्रभावशाली महिला २०२६’ मा छनोट भएपछि गुरुङले भन्नू भयो,
“यो सम्मान मेरो मात्र होइन, सचेत र दिगो भविष्य निर्माणमा विश्वास गर्ने सबैको हो। ‘कोक्रोमा’ मार्फत हाम्रो यात्रा सधैं सरलता, दिगोपन र बच्चा तथा धर्तीमैत्री ‘स्लो फेसन’ निर्माणसँग जोडिएको छ।”
उहाले आफ्नो यात्रामा साथ दिने सम्पूर्ण ग्राहक, समुदाय र समर्थकप्रति कृतज्ञता व्यक्त गर्नु भएक्क छ।
गुरुङको यो सफलता कथा मेहनत, धैर्यता र दृढ संकल्पको प्रेरणादायी उदाहरण बनेको छ।
