दुधौली न्युज सम्वाददाता
२१ चैत्र २०८१
सिन्धुली जिल्लाको दुधौली नगरपालिका वडा नम्बर १० मा रहेको आईकोनिक ‘दुधौली’ लेखिएको शब्द अज्ञात समूहले तोडफोड गरेको छ। दुधौली नगरपालिका १० को सहिद पार्कमा एक महिना अगाडि निर्माण गरिएको उक्त आईकोनिक शब्दको ‘यच’ र ‘आई’ अक्षर पूर्ण रूपमा नष्ट गरिएको छ।
घटनाबारे इलाका प्रहरी कार्यालय डकाहाले जानकारी दिँदै आज राति करिब २ बजेको समयमा तोडफोड गरिएको बताएको छ। करिब ९ लाख रुपैयाँको लागतमा निर्माण गरिएको उक्त ‘दुधौली’ शब्द स्थानीयबासीहरूले निकै मन पराएका थिए र खुलेर प्रशंसा गरेका थिए। यसले दुधौली नगरपालिकाको पहिचान बोकेको थियो।
प्रहरीले घटनाको अनुसन्धान सुरु गरिसकेको छ र हालसम्म दुई जना युवालाई अनुसन्धानका लागि थुनामा राखिएको छ। इलाका प्रहरी कार्यालयका अनुसार सीसीटीभी फुटेजमा केही युवाहरू प्रस्ट देखिएको पुष्टि भएको छ।
यस घटनाले स्थानीय समुदायमा निराशा छाएको छ, साथै प्रहरी प्रशासनले दोषी पहिचान गरी कारबाही गर्ने प्रतिबद्धता व्यक्त गरेको छ।
