दुधौली एफ.एम सम्वाददाता
दुधौली / आगामी फागुन २१ गते हुने प्रतिनिधिसभा सदस्य निर्वाचन नजिकिँदै जाँदा सिन्धुली निर्वाचन क्षेत्र नम्बर १ अन्तर्गत दुधौली नगरपालिकामा चुनावी गतिविधि उल्लेख्य रूपमा बढेको छ। निर्वाचनमा होमिएका विभिन्न राजनीतिक दल तथा स्वतन्त्र उम्मेदवारहरूले दुधौली केन्द्रित घरदैलो तथा जनसम्पर्क अभियानलाई तीव्रता दिएका छन्।
निर्वाचनको मिति आउन अब एक सातामात्र बाँकी रहँदा दुधौलीका बस्ती–बस्तीमा उम्मेदवारहरूको आवतजावत, कार्यकर्ता परिचालन तथा चुनावी नारा–पोस्टरले माहोल तताएको छ। स्थानीय मतदातासँग प्रत्यक्ष भेटघाट गर्दै उम्मेदवारहरूले आफ्ना एजेन्डा र प्रतिबद्धता प्रस्तुत गरिरहेका छन्।
सिन्धुली क्षेत्र नम्बर १ का उम्मेदवारहरूले प्रारम्भमा माथिल्लो भेगका तीन वडामा केन्द्रित रहेर अभियान सञ्चालन गरेका थिए। ती क्षेत्रका घरदैलो कार्यक्रम सम्पन्न गरेपछि अहिले उनीहरू कमलाखोज तथा बेशी क्षेत्रतर्फ केन्द्रित भएका छन्।
नेपाली कांग्रेस र नेपाल कम्युनिस्ट पार्टी (एमाले) जस्ता स्थापित दलका उम्मेदवारहरूले संगठित ढंगले जनसम्पर्क कार्यक्रम अगाडि बढाउँदै विकास, पूर्वाधार, शिक्षा, स्वास्थ्य तथा रोजगारीलाई मुख्य चुनावी एजेन्डा बनाएका छन्। ती दलका कार्यकर्ताहरू समेत सक्रिय रूपमा परिचालन भई मतदाता फकाउने अभियानमा जुटेका छन्।
यता नयाँ शक्तिका रूपमा अघि बढिरहेका राष्ट्रिय स्वतन्त्र पार्टी र श्रम संस्कृति पार्टी लगायतका दलहरूले फरक रणनीति अपनाएका छन्। उनीहरूले सुरुवातमै दुधौलीको तल्लो भेगमा घरदैलो कार्यक्रम सञ्चालन गरी अहिले क्रमशः पहाडी तथा माथिल्लो क्षेत्रतर्फ अभियान विस्तार गरिरहेका छन्। नयाँ दलहरूले सुशासन, पारदर्शिता, रोजगारी सिर्जना तथा परम्परागत राजनीतिक अभ्यासप्रति असन्तुष्टि जनाउँदै मतदातालाई आकर्षित गर्ने प्रयास गरिरहेका छन्।
निर्वाचन नजिकिँदै जाँदा दुधौली क्षेत्रमा चुनावी सरगर्मी थप बढ्ने अनुमान गरिएको छ। स्थानीय मतदाताहरू पनि उम्मेदवारका एजेन्डा, व्यवहार र विगतका कार्यसम्पादनबारे छलफल गर्दै निर्णय प्रक्रियामा सक्रिय देखिएका छन्।
फागुन २१ को निर्वाचनले दुधौलीसहित समग्र सिन्धुली क्षेत्रको राजनीतिक दिशा निर्धारण गर्ने भएकाले आगामी दिनमा यहाँको चुनावी गतिविधि अझै सघन र प्रतिस्पर्धात्मक हुने निश्चित देखिन्छ।
