एफ.एम. सम्बाददाता
दुधौली , असार १४
— नागरिकको सवाल, जनप्रतिनिधिको जवाफ भन्ने मूल नारासहित दुधौली नगरपालिकाको वडा नम्बर १३, सिन्धुलीमा आज सार्वजनिक सुनुवाइ कार्यक्रम सम्पन्न भएको छ ।
दुधौली नगरपालिका वडा नम्बर १३ का वडा अध्यक्ष दीपक खड्काको सभा अध्यक्षता तथा दुधौली नगरपालिकाकाका कार्यवाहक नगर प्रमुख चन्द्र किशोर थारूको प्रमुख आतिथ्ययतामा कार्यक्रमको आयोजना भएको थियो । यसै गरी दुधौली नगरको निमित्त प्रमुख प्रशासकीय अधिकृत सुबोध निरौला, कृषि शाखा प्रमुख सिता खतिवडा, योजना शाखाका प्रमुख अमृता खड्डा लगायत विभिन्न शाखाका प्रमुख तथा प्रतिनिधिहरूको उपस्थित रहेको थियो ।
सहभागिता, उत्तरदायित्व, जवाफदेहिता, पारदर्शिता र सुशासन प्रवद्र्धन गर्ने उद्देश्यले आयोजना गरिएको कार्यक्रममा नागरिकहरुले जनप्रतिनिधिहरूसँग प्रत्यक्ष संवाद गर्दै विभिन्न विकास निर्माण कार्य, सेवा प्रवाह, बजेट उपयोगिता लगायत विषयमा प्रश्न उठाएका थिए । दुधौली नगरपालिकाको वडा नम्बर १२, १३ र १४ का स्थानीयहरूलाई सामाजिक सुरक्षा भत्ता लिन समस्या भएको , सडक, शिक्षा, खानेपानी र स्वास्थ्यको समस्याको विषयमा प्रश्नहरु आएको थियो ।
कार्यक्रममा आएको प्रश्न उत्तर सम्बन्धित सरोकारवाला शाखाका प्रमुख साथै कार्यवाहक नगर प्रमुख चन्द्रकिशोर थारूले दिनु भएको थियो । कार्यक्रममा जनप्रतिनिधिहरूले नागरिकका जिज्ञासाको जवाफ दिँदै नगरपालिकाले अघि सारेका योजनाहरू, चुनौतीहरू र भावी वाक्ययोजनाका बारेमा जानकारी दिनु भएको थियो ।
कार्यक्रम दुधौली नगरपालिकाको आयोजनामा र कमलाखोज मिडिया प्रा.लि., दुधौली सिन्धुलीको सहकार्यमा सम्पन्न भएको हो । सार्वजनिक सुनुवाइ कार्यक्रममार्फत नागरिक र स्थानीय सरकारबीचको आपसी समझदारी, जवाफदेहिता र पारदर्शितालाई अझ मजबुत बनाउने अपेक्षा गरिएको छ।
