५० बिगाहा खेत सिंचाइ संकटमा
दुधौली, असार ५ । सिन्धुलीको दुधौली नगरपालिका वडा नं–१३ (साविक अरुणठाकुर गाविस वडा नं ७ र ८) मा असार १ गते रातिको अविरल वर्षापछि आएको भेलले सान्दाने खोलाको मुहान भत्काउँदा स्थानीय किसान गम्भीर संकटमा परेका छन्।
खोलाको मुहान नष्ट भएसँगै किसेटार, पैकारीडाँडा, गोरेडाँडा, माथिल्लो ढिकिथुम्का र तल्लो ढिकिथुम्का क्षेत्रका १३० घरधुरी (मोही) प्रभावित भएका छन्। सो क्षेत्रको करिब ५० बिगाहा खेतीयोग्य जमिनमा सिंचाइ पुर्याउने मुख्य कुलो पूर्ण रूपमा अवरुद्ध भएको छ। स्थानीयवासीका अनुसार कुलो सहजै मर्मत सम्भव नहुने गरी क्षतिग्रस्त भएकाले अब धान रोपाइँ हुने कि नहुने भन्ने अन्योल उत्पन्न भएको छ।
रोपाइँको मुख्य समय सुरु भइसकेको अवस्थामा सिंचाइ अभावले वर्षभरिको खाद्यान्न उत्पादन प्रभावित हुने चिन्ता बढेको छ। “हामी अहिले एकदमै अप्ठ्यारोमा छौं, पानी नभए धान रोप्न सकिन्न,” एक स्थानीय किसानले बताए, “तत्काल सम्बन्धित निकायको ध्यान जानु जरुरी छ।” स्थानीयवासीहरूले समस्या यथाशीघ्र अवलोकन गरी समाधान गरिदिन दुधौली नगरपालिका, सिँचाइ डिभिजन कार्यालय र सम्बन्धित सरकारी निकायको गम्भीर ध्यानाकर्षण गराएका छन्।
