दुधौली एफ.एम. सम्वाददाता
सिन्धुली, असार ४,
दुधौली नगरपालिका–११ मरघट्टीकी एक बालिकाको पोखरीमा डुबेर मृत्यु भएको छ। ममता सुनुवार नाम गरेकी ८ वर्षीया बालिका सोमबार साँझ घर नजिकै रहेको सानोचौरी दुईधारा संस्थाद्वारा सिँचाइको लागि खनिएको जोडीगैरी पोखरीमा पौडी खेल्ने क्रममा डुबेर मृत्यु भएको हो। साँझ करिब ४ बजे ममता पोखरीमा पौडी खेल्ने क्रममा डुबेकी थिइन्। सोही समयमा पानी लिन जाँदै गरेका रामबहादुर सुनुवारका १२ वर्षीय छोरा संगम सुनुवारले उनलाई डुबिरहेको देखेपछि तत्काल पोखरीबाट निकालेर ममताका ठुलोबुबा खेलमान सुनुवारलाई खबर गरेका थिए।
उपचारका लागि कटारी नगरपालिका स्थित कटारी अस्पताल, उदयपुर पुर्याइएको थियो। तर अस्पताल पुर्याइएलगत्तै साँझ ५:२५ बजे चिकित्सकले उनलाई मृत घोषणा गरेका थिए। घटनाबारे जानकारी पाएपछि प्रहरी चौकी दुधौलीबाट प्रहरी नायव निरीक्षक (प्र.ना.नि) बिरेन्द्र गिरीको कमाण्डमा टोली घटनास्थलतर्फ खटिएको थियो। शवलाई पोष्टमार्टमका लागि दुधौली नगर अस्पताल सिर्थौली पठाइएको छ। उक्त घटनाबारे थप अनुसन्धान तथा कानुनी प्रक्रिया अगाडि बढाउन इलाका प्रहरी कार्यालय डकाहाबाट प्रहरी निरीक्षक (प्र.नि) सिमोन धितालको नेतृत्वमा टोली खटिएको प्रहरीले जनाएको छ। घटनास्थल प्रहरी चौकी दुधौलीबाट करिब १५ किलोमिटर पश्चिम तथा इलाका प्रहरी कार्यालय डकाहाबाट २० किलोमिटर पूर्वदक्षिणमा पर्छ।
