दुधौली एफएम. सम्बाददाता
दुधौली/ सिन्धुलीको दुधौली नगरपालिकामा सहकारी क्षेत्रका पदाधिकारी तथा कर्मचारीहरूलाई लक्षित गरी वित्तीय साक्षरता सम्बन्धी तालिम सम्पन्न भएको छ।
सिर्जना कृषि सहकारी संस्था लिमिटेडको आयोजनामा दुधौली नगरपालिकाको सभाहलमा आयोजित तालिम कार्यक्रम संस्थाका अध्यक्ष पूर्णबहादुर खत्रीको सभाध्यक्षता तथा दुधौली नगरपालिकाका नगर प्रवक्ता दीपक खड्काको प्रमुख आतिथ्यतामा सम्पन्न भएको हो। कार्यक्रममा राष्ट्रिय सहकारी महासंघको प्राविधिक सहयोग रहेको आयोजकले जनाएको छ।
दुधौली नगरपालिका भित्र रहेका ३० वटा सहकारी संस्थाबाट सञ्चालक समितिका एक जना प्रतिनिधि र एक जना कर्मचारी गरी ६० जनाको सहभागिता रहेको थियो। तालिममा वित्तीय साक्षरताको परिचय, यसको लक्ष्य, उद्देश्य र महत्व, बचतको अवधारणा तथा बचतका फाइदा, ऋण लिँदा ध्यान दिनुपर्ने विषय, ऋणको सही सदुपयोग, पारिवारिक बजेट निर्माण तथा आम्दानी–खर्च व्यवस्थापन लगायतका विषयमा प्रशिक्षण प्रदान गरिएको थियो। साथै सहकारी सम्बन्धी ऐन, नियम तथा कानुनी व्यवस्थाबारे समेत जानकारी गराइएको थियो।
समापन कार्यक्रममा सहभागी होमकुमारी ठकुरीले तालिम प्रभावकारी रहेको बताउँदै सिकेका ज्ञान र सीपलाई आफ्नो सहकारीमा व्यवहारिक रूपमा प्रयोग गर्ने प्रतिबद्धता व्यक्त गरिन्। उनले यस्ता तालिमलाई अझै लामो अवधि, प्रयोगात्मक अभ्यास तथा फिल्ड भिजिटसहित सञ्चालन गर्न सके सहभागीहरूका लागि थप उपयोगी हुने धारणा राखिन्।
कार्यक्रमका वक्ताहरूले सहकारी संस्थाको दिगो विकास, वित्तीय अनुशासन तथा सदस्यहरूको आर्थिक सशक्तीकरणका लागि वित्तीय साक्षरताको महत्वपूर्ण भूमिका रहने बताएका थिए। आयोजक संस्थाले सहकारी क्षेत्रको क्षमता अभिवृद्धिका लागि यस्ता कार्यक्रमलाई आगामी दिनमा पनि निरन्तरता दिने जनाएको छ।
