प्रतिमा दियाली
सिन्धुली, दुधौली – खुलाल बुढाथोकी बंशको परम्परागत कुलपूजा यस वर्ष पनि सिन्धुलीको दुधौली नगरपालिका–९ स्थित कट्टी लखनपुरमा भव्य रूपमा सम्पन्न गरिएको छ। धनञ्जय गोत्र अन्तर्गत पर्ने बुढाथोकी बंशले प्रत्येक तीन–तीन वर्षमा आयोजना गर्दै आएको यो धार्मिक तथा सांस्कृतिक कार्यक्रम शनिबार एक विशेष समारोहका बीच सम्पन्न भयो।
कार्यक्रममा दुधौली नगरपालिका वडा नं. ८, ९, १२, १३ लगायत आसपासका क्षेत्रहरू तथा उदयपुर लगायतका जिल्लाबाट आएका बुढाथोकी वंशज र अन्य समुदायका गरी ५०० भन्दा बढी सहभागीहरूको उपस्थिति रहेको थियो।
बुढाथोकी सेवा समाजको आयोजनामा सम्पन्न यो कुलपूजामा परम्परागत बलि प्रथालाई समेत निरन्तरता दिइएको संयोजक पूर्णबहादुर बुढाथोकीले जानकारी दिनुभयो। उहाँले पूर्खाले थालनी गरेको परम्परागत कुलआराधनालाई निरन्तरता दिँदै बंश, संस्कृति र सन्तानको उन्नति तथा कुलको सम्मानका लागि कार्यक्रम आयोजना गरिएको आयोजक समितिका सदस्य तथा सहजकर्ता दिपेन्द्र बुढाथोकीले बताउनुभयो।
पूजामा ९८ वटा बोका र ९८ वटा पाठी बलि दिई आराधना गरिएको थियो। कार्यक्रममा सहभागी सम्पूर्ण बुढाथोकी दाजुभाइ तथा परिवारजनको सहयोगमा आर्थिक व्यवस्थापन गरिएको कार्यक्रमका सहजकर्ता बुढाथोकीले जानकारी दिनुभयो।
संस्कृति, परम्परा र पुर्खाको स्मृति जीवित राख्ने उद्देश्यले गरिएको कुलपूजा समाजमा धार्मिक, सामाजिक र पारिवारिक एकता अभिवृद्धि गर्न महत्वपूर्ण हुने विश्वास सहभागीहरूले व्यक्त गरेका छन्।
