सिन्धुली, २०८२ बैशाख ३० — सिन्धुलीको दुधौली नगरपालिका–८ खोरभन्ज्याङस्थित मदन भण्डारी राजमार्गमा बिहान भएको सवारी दुर्घटनामा एक १० वर्षीय बालकको मृत्यु भएको छ।
बिहान ११:१५ बजे कटारीबाट डकाहातर्फ गइरहेको BAB–०१८८ नम्बरको कारले सडक पार गर्ने क्रममा बालकलाई ठक्कर दिएको हो। दुर्घटनामा दुधौली नगरपालिका–८, चिहानडाँडा निवासी गंगाराम सदाका अन्दाजी ९/१० वर्षीय छोरा मन्देश सदा गम्भीर घाइते भएका थिए।
प्रहरीका अनुसार बालकको बाँया खुट्टा, टाउको र शरीरका विभिन्न भागमा गम्भीर चोट लागेको थियो। उनलाई तत्काल उपचारका लागि दुधौली नगर अस्पताल सिर्थौली लगिएको थियो। तर उपचारका क्रममा मध्यान्ह १२:०५ बजे उनको मृत्यु भएको जिल्ला प्रहरी कार्यालय सिन्धुलीले पुष्टि गरेको छ।
उक्त कार संखुवासभा जिल्ला, चैनपुर नगरपालिका–१० निवासी ३४ वर्षीय रामकुमार राईले चलाएका थिए। उनलाई प्रहरीले नियन्त्रणमा लिएको जिल्ला प्रहरी कार्यालय सिन्धुलीका प्रहरी नायब उपरीक्षक (डीएसपी) सूर्य प्रकाश सुवेदीले जनाएको छ ।घटनाबारे जानकारी दिँदै थप अनुसन्धान भइरहेको बताएका छन् ।
