सिन्धुली — मदन भण्डारी लोकमार्गअन्तर्गत सिन्धुलीको दुधौली नगरपालिका-४, एकहटियामा बिहीबार ईभी गाडी र मोटरसाइकल आपसमा ठोक्किँदा ११ जना घाइते भएका छन् भने एक जनाको मृत्यु भएको छ। जिल्ला प्रहरी कार्यालयका अनुसार मृत्यु हुनेमा सिन्धुली जिल्ला तिनपाटन गाउँपालिका-१० औलका २६ वर्षीय प्रेम राना मगर रहेका छन्। दुर्घटना उदयपुरबाट काठमाडौं जाँदै गरेको बा–प्र ०३–०१–४४५ नम्बरको ईभी गाडी र डकाहाबाट दुधौलीतर्फ जाँदै गरेको प्र २–००१–प७०११ नम्बरको मोटरसाइकल एकआपसमा ठोक्किँदा भएको थियो।
घाइतेहरूको उपचार दुधौली नगर अस्पताल सिर्थौलीमा भइरहेको छ। प्रहरीका अनुसार ईभी चालक सामान्य घाइते भएका छन् र उनलाई नियन्त्रणमा लिइएको छ। सिन्धुली प्रहरी प्रमुख एसपी गोविन्दराज काफ्लेका अनुसार दुर्घटनाको विस्तृत अनुसन्धान भइरहेको छ।
