दुधौली एफ.एफ.सम्वाददाता
दुधौली / बागमती प्रदेशअन्तर्गत सिन्धुली जिल्लाका जगाडी, धनसरी, गणेशमान र चारनाथ नगरपालिकालाई जोड्ने महत्त्वपूर्ण सडक आयोजनाअन्तर्गत कालोपत्रे (ब्ल्याकटप) कार्य सुरु गरिएको छ। निर्माण सुरु भएको केही महिनामै निर्माण कम्पनीले कालोपत्रे प्रक्रिया अघि बढाएको हो।
हाल दुधौली नगरपालिका–११ स्थित सिरिपुरदेखि टाडी सडक खण्डमा कालोपत्रे कार्य सुरु गरिएको निर्माण पक्षले जनाएको छ। ग्रामीण सम्पर्क सुधार आयोजना (Rural Connectivity Improvement Project – RCIP) अन्तर्गत निर्माण भइरहेको उक्त सडकमा स्तरोन्नतिसँगै कार्यसम्पादनमा आधारित मर्मतसम्भारसमेत गरिनेछ।
स्थानीयका अनुसार छोटा तथा ठूला खहरेका कारण निकै जोखिमपूर्ण र कठिन मानिने यस सडक खण्डमा निर्माण कार्य सुरु भएसँगै अहिले तीव्र गतिमा काम अघि बढिरहेको छ। कुल १६ किलोमिटर लम्बाइ रहेको सडक मध्ये हालसम्म करिब ९ किलोमिटर स्तरोन्नति सम्पन्न भइसकेको निर्माण कम्पनीले जनाएको छ।
बागमती प्रदेश सरकारको भौतिक पूर्वाधार विकास मन्त्रालय अन्तर्गत पूर्वाधार विकास निर्देशनालयमार्फत सञ्चालन गरिएको यस आयोजनाको सम्झौता २०८१ कात्तिक १५ गते गरिएको थियो। सम्झौताअनुसार ३६५ दिनभित्र निर्माण कार्य सम्पन्न गरी त्यसपछि ७३० दिनसम्म कार्यसम्पादनमा आधारित मर्मतसम्भार गरिनेछ।
आयोजनाको कुल लागत ३३ करोड ४६ लाख ३८ हजार ८ सय २६ रुपैयाँ ३९ पैसा रहेको छ, जसमा भ्याट तथा प्रोभिजनल रकमसमेत समावेश गरिएको छ। निर्माणको जिम्मा ललितपुरस्थित एम/एस दिवा पाण्डे एण्ड कम्पनीले पाएको छ। सडक निर्माण सम्पन्न भएपछि दुधौली क्षेत्रका बासिन्दालाई यातायात, व्यापार तथा सेवा–सुविधामा उल्लेखनीय सहजता हुने अपेक्षा गरिएको छ।
