दुधौली एफएम सम्बाददाता
सिन्धुली / सिन्धुलीको दुधौली नगरपालिका–५ स्थित कुलुवा पुल फुटबल ग्राउण्ड नजिकबाट प्रहरीले लागू औषधसहित दुई जनालाई नियन्त्रणमा लिएको छ। गए राति करिब ११ः५५ बजे इलाका प्रहरी कार्यालय डकाहाबाट खटिएको गस्ती टोलीले शंका लागी खानतलासी गर्दा ठूलो मात्रामा लागू औषध बरामद भएपछि उनीहरू पक्राउ परेका हुन्।
इलाका प्रहरी कार्यालय डकाहाका प्रहरी निरीक्षक सपना खड्काको कमाण्डमा खटिएको टोलीले पक्राउ परेकामध्ये दुधौली नगरपालिका–५ बस्ने २६ वर्षीय सिताराम बुढाथोकीको साथबाट KaF D ट्याब्लेट ४५ थान, OPO ट्याब्लेट २०० थान, SPASMO ट्याब्लेट २३१ थान गरी जम्मा ४७६ ट्याब्लेट, लागू औषध गाँजा ५०० ग्राम, नगद रु. २८ हजार ६१६ र एक थान पल्सर मोटरसाइकल बरामद गरेको छ।
त्यसैगरी सोही स्थान बस्ने २० वर्षीय मानबहादुर विश्वकर्माको साथबाट KaF D ट्याब्लेट ४९ थान, OPO ट्याब्लेट ९० थान, SPASMO ट्याब्लेट ९० थान गरी जम्मा २२९ ट्याब्लेट तथा लागू औषध गाँजा ३०० ग्राम फेला परेको प्रहरीले जनाएको छ।
पक्राउ परेका दुवै जनालाई थप अनुसन्धानका लागि सम्मानित अदालतबाट पाँच दिनको म्याद लिई अनुसन्धान प्रक्रिया अगाडि बढाइएको जिल्ला प्रहरीले जनाएको छ।
