रोहित कुमार गुरुङ
सिन्धुली, दुधौली — बागमती प्रदेशको गौरवको योजना अन्तर्गत सिन्धुलीको दुधौली नगरपालिका–९ मा करोडौँ रुपैयाँ लगानीमा सुरु गरिएको रङ्गशाला आज अलपत्र अवस्थामा छ। खेलाडीले अभ्यास गर्ने, प्रतियोगिता सञ्चालन गर्ने र खेलप्रेमी दर्शकले उत्साहपूर्वक खेल अवलोकन गर्ने अपेक्षामा थालिएको यो योजना अहिले उपेक्षित र बिग्रँदै गएको छ।
करोडौँ खर्च, अधुरो काम
प्रदेश सरकारको ७ करोड ४६ लाख रुपैयाँभन्दा बढी लागतमा निर्माण कार्य सुरु गरिएको रङ्गशालाले भौतिक संरचना त पाएको छ तर मैदान भने अधुरो छ । एक सय मिटर लम्बाइ र ६० मिटर चौडाइको खेलमैदान, १५ सयभन्दा बढी दर्शक अटाउने प्याराफिट, पार्किङ, चेन्जिङ रुम, शौचालय, मिटिङ हललगायतका सुविधा रहने योजना थियो। तर खेलमैदान निर्माण हुन नसक्दा रङ्गशाला अहिलेसम्म प्रयोगमा आउन सकेको छैन।
रङ्गशाला भित्रको दुर्दशा
रङ्गशालाको प्रमुख प्रवेशद्वार भत्किएको छ । ढोकाबाट भित्र पस्नासाथ बायाँतर्फका शौचालय र कोठाभित्र मादक पदार्थ, लागु पदार्थका खोलदेखि प्रयोग भइसकेका कण्डमसम्म फेला पर्छन् । खेलाडीको आवाज गुञ्जिनु पर्ने मैदान अहिले बाख्रा–भैँसी चरण स्थल बनेको छ । स्थानीयवासीका अनुसार रङ्गशाला भित्र रातमा युवाहरू भेला भई मदिरा सेवन गर्ने, झ्यालका सिसा फुटाउने र अनैतिक क्रियाकलाप गर्नेसम्म गरेका छन् ।
स्थानीयको असन्तोष
“करोडौँ खर्चेर बनेको संरचना हेर्दा मन दुख्छ । खेलाडी त परै जाओस्, अहिले रङ्गशाला हेर्दा गोठभन्दा भिन्न छैन,” एक स्थानीयले गुनासो गर्दै भने । उनीहरूको आरोप छ— प्रदेश सरकारले बनाईदिएको उपाहार स्वरूपको संरचना स्थानीय सरकारले निगरानी नगर्दा र सरोकारवालाहरूले बेवास्ता गर्दा रङ्गशालामा लगानी गरिएको रकम पानीमा बगेजस्तै भएको छ ।
निगरानी अभावमा लगानी खेर
सार्वजनिक निर्माण कार्यान्वयन एकाइ धुलिखेलका प्रमुखका अनुसार रङ्गशालाले प्रदेशकै स्तरमा खेलकुदलाई अघि बढाउन सक्ने सम्भावना बोकेको छ। तर, प्रदेश सरकारको तल्लो तहसम्म प्रभावकारी निगरानी गर्ने संरचना नहुँदा जिल्लामा आएको बजेट दुरुपयोग भएको छ। जिल्लामा मात्र होइन, बागमती प्रदेशले सुरु गरेका धेरै योजनाहरू अधुरै छोडिएका छन् ।
दूरदर्शी निर्णय भएन
बागमती प्रदेश सरकारले दुधौलीमा खेलकुदको लागि रङ्गशाला निर्माण गर्ने भए पछि सरोकारवालाहरू सँग पर्याप्त छलफल नै नगरी रङ्गशाला निर्माणको निर्णय भयो । जुन निर्माण भए पछि मात्रै स्थानीयहरूलाई थाहा भयो । सार्वजनिक संरचनाहरू सबैको पहुँच पुग्ने स्थानमा हुनु एकान्त स्थानमा खेलाको तिरमा , प्रदेश र जिल्लको छेउमा लगियो जहाँ कोही जानलाई घण्टौ लाग्छ । यसमा खेलाडीहरू र खेल प्रेमीको हितमा हुने गरी पहुँच पुग्ने गरी दीर्घकालन र दूरदर्शी सोचका साथ निर्णय नै भएन ।
खेलकुद विकास वा सरकारको असफलता ?
रङ्गशाला बन्ने समाचारसँगै दुधौलीका खेल प्रेमी युवामा उत्साह जगाएको थियो। तर समयमै मैदान निर्माण नहुनु र संरचना जीर्ण बन्न थालेपछि उनीहरू निराश छन्। खेलकुदको विकासका लागि भन्दै प्रदेश सरकारले देखाएको “गौरवको योजना” अहिले उपेक्षाको शिकार बनेको छ।
स्थानीयवासीहरू भन्छन् — “रङ्गशाला पूरा गरेर प्रयोगमा ल्याइएन भने करोडौँ रुपैयाँको लगानी बेकार मात्र होइन, खेलकुदमै ठूलो धक्का लाग्नेछ।”
