दुधौली एफ.एम. सम्बाददाता
सिन्धुली, असार २५
दुधौली नगरपालिका–१३ मा २२ वर्षअघि भएको कार्की दम्पतीको विभत्स हत्यामा संलग्न अभियुक्त केदार सिंह थापा लामो समयपछि पक्राउ परेका छन्। ढिलो भए पनि मुख्य अभियुक्त पक्राउ परेपछि मृतकका परिवारले न्याय पाउने आशा बोकेर जिल्ला सदरमुकाम धाउन थालेका छन्।
२०६० साल मंसिर ६ गते राति धारिलो हतियार प्रयोग गरी दुधौलीका ४५ वर्षीय रत्नबहादुर कार्की र उनकी श्रीमती दुर्गामाया कार्कीको क्रुर हत्या गरिएको थियो। घटनालगत्तै फरार भएका थापा वर्षौंसम्म फरार रहेका थिए।
जिल्ला प्रहरी कार्यालय सिन्धुलीका प्रहरी नायब उपरीक्षक सूर्य प्रकाश सुवेदीका अनुसार निरन्तर अनुसन्धानपछि अभियुक्त थापा दाङको लमही नगरपालिका–९, जलकुण्डीमा लुकीछिपी बसिरहेको अवस्थामा असार २३ गते पक्राउ गरिएको हो।
हत्या भएको समय मृतकका छोरा दुर्गा बहादुर कार्कीले तत्कालीन उदयपुर मवखु गाविस–६ (हाल कटारी नगरपालिका–१३) निवासी केदार सिंह थापाविरुद्ध किटानी जाहेरी दिएका थिए। तर थापा फरार रहँदै आएका थिए।अन्दाजी ५७ वर्षका थापालाई प्रहरीले नियन्त्रणमा लिएर जिल्ला अदालत सिन्धुलीबाट म्याद थप गराई थप अनुसन्धान गरिरहेको छ।
पीडित परिवारले घटनामा राजनीतिक प्रभाव वा दबाब नपरोस् र कुनै बहानामा अभियुक्त उम्कन नदिई ढिलो भए पनि उचित न्याय दिन सबै पक्षसँग आग्रह गरेका छन्।पीडित पक्षले भने, “२२ वर्षअघि हाँस्दो–खेल्दो जीवन बिताइरहेको हाम्रो परिवारमा बज्रपात झरेको थियो। आज पनि त्यो घाउ ताजा नै छ। अब ढिलो भए पनि न्याय पाउने आशा पलाएको छ।”
