दुधोली एफ.एम. सम्वाददाता
दुधौली, सिन्धुली —सिन्धुली जिल्लाको दुधौली नगरपालिका–१, राँगे निवासी ३४ वर्षीय खिलबहादुर भुजेल भारतिय मानव बेचबिखन, मिर्गौला तस्करीको शिकार भएका छन्। रोजगारीको प्रलोभनमा पोखराबाट भारत लगिएका भुजेलको एक मिर्गौला निकालिएर नेपाल फकईएको पिडितको भनाई रहेको छ ।
पीडित भुजेलका अनुसार उनी केही समयअघि पोखरा पुगेका थिए। त्यहाँ होटेलमा काम लगाइदिने भन्दै चिनजान नभएका व्यक्तिले उनलाई भारत लगेका थिए। भारत पुगेपछि प्रारम्भमा केही दिन होटेलमा काम लगाइए पनि त्यसपछि उनलाई बेहोस बनाई मिर्गौला निकालिएको उनले बताएका छन्।
“सपना देखेजस्तो लाग्यो, के भएको थाहा नै भएन। एक्कासि होस खुल्दा नेपालकै कलँकी चोकमा थिएँ,” उनले भने। उनका अनुसार तीन दिनअघि भारतमै शल्यक्रिया गरिएको घाउ अझै बल्झिएको छ र उनी हाल ज्वरो तथा अत्यधिक शारीरिक पीडामा छन्।
भुजेल घर फर्किएपछि उनलाई आफन्तहरूले दुधौलीको समिट माउन्टेन अस्पताल डकाहामा स्वास्थ्य परीक्षण गराएका थिए। अस्पतालका चिकित्सकले उनको शरीरमा एउटा मात्र मिर्गौला रहेको पुष्टि गरेका छन्। घटनामा संलग्न व्यक्तिको वास्तविक पहिचान अझै खुल्न सकेको छैन भने घटनाबारे औपचारिक अनुसन्धान सुरु नभएको इलाका प्रहरी कार्यालय डकाहाले जनाएको छ।
स्थानीयको आक्रोश, तत्काल छानबिनको माग
यो घटना गम्भीर प्रकृतिको मानव अंग तस्करी भएको भन्दै पीडित परिवार र स्थानीयवासीहरूले दोषीको पहिचान गरी कारबाहीको माग गरेका छन्।
“यो केवल खिलबहादुरको कुरा होइन, धेरै युवाहरू यस्तै जालसाजीको सिकार हुने खतरा बढेको छ,” एक स्थानीयले बताए। यस घटनाले रोजगारीको नाममा नेपाली युवालाई विदेश लगेर अंग तस्करी गर्ने आपराधिक गिरोह अझै सक्रिय रहेको संकेत दिएको छ। मानव अधिकार उल्लङ्घनसँग प्रत्यक्ष सम्बन्धित यस घटनामा सम्बन्धित सुरक्षा निकायहरू तथा सरकारले गम्भीरताका साथ अनुसन्धान अघि बढाउनुपर्ने स्थानीयको माग छ।
