दुधौली एफ.एम. सम्वाददाता
सिन्धुली, दुधौली — राष्ट्रिय स्वतन्त्र पार्टी (रास्वपा) दुधौली नगर समितिले पछिल्लो समय वडा अधिवेशनलाई तीव्रता दिएको छ । यो अधिवेशनले पुरानो बिरासत बोकेका मूलधारका भन्ने दलहरूलाई कडा चुनौती दिएको छ । दुधौलीका वडाहरूमा सम्पन्न भई रहेको वडा अधिवेशनको माहोल देखेर दुधौलीका पुराना दलका नेताहरूमा हलचल नैमचिन थालेको विश्लेषकहरूको भनाई रहेको छ । केही समयसम्म करिब निष्क्रियजस्तै देखिएको रास्वपा नगर समिति हाल सक्रिय बन्दै वडा–वडामा पार्टी विस्तारको काम अघि बढाइरहेको छ ।
रास्वपाले आयोजना गरेको वडा अधिवेशनहरूमा युवा देखि ति पुराना पार्टीमा लामो समय प्रत्यक्ष अप्रत्यक्ष बलिदान दिएका जेष्ठ नागरिकहरू समेतको भिड लाग्न थालेको देखिन्छ । केही महिना देखि दुधौलीमा सुरु गरेको रास्वपाको वडा भेलामा सबै भन्दा बढी दुधौली ५ को सिर्थौलीमा सम्पन्न भएको वडामा पार्टी प्रवेश गरेको रास्वपा दुधौलीको दावी रहेको छ । दुधौली नगर समितिका अनुसार दुधौली नगरपालिका १० र ५ मा सबै भन्दा बढि मात्रमा पार्टी प्रवेश गरेको बताएका छन् ।
दुधौली नगरपालिकाका जम्मा १४ वटा वडामध्ये हालसम्म १० वडामा अधिवेशन सम्पन्न भइसकेको नगर सचिव दिनेस साप्कोटाले जानकारी दिनुभयो। उहाँका अनुसार वडा नं. २, ६, ८ र १२ मा अधिवेशन हुन अझै बाँकी छ। “यी वडामा पनि अधिवेशन दशैंअघि सकाउने तयारी छ, वर्षातले केही असर पार्ला कि भन्ने हो,” सापकोटाले भन्नुभयो।
नगर समितिको दाबी अनुसार वडा अधिवेशनका क्रममा नयाँ पुस्ता, सचेत नागरिक र स्थानीय बासिन्दाबिच पार्टीप्रतिको चासो र विश्वास उल्लेख्य रूपमा बढ्दै गएको छ। पुराना राजनीतिक दलहरूले गरेका असफलता र जनविश्वासमा गरेका घातका कारण रास्वपातर्फ आकर्षण बढेको समितिको दाबी छ।
“पुराना दलहरूको असली रूप सबैले देखिसकेका छन्। जनताले अथाह विश्वास गरे पनि ती दलका नेताहरूले निराश मात्र पारे। त्यसको विकल्पका रूपमा हाम्रो अभियानलाई समर्थन बढ्दै गएको हो,” सचिव सापकोटाले बताउनुभयो।
समितिले हालसम्म १ हजारभन्दा बढी सक्रिय सदस्यता लिइसकेको जनाएको छ। तर अझै धेरै नागरिकले खुलेर पार्टीमा प्रवेश नगरे पनि आस्थावान् समर्थकको सङ्ख्या निरन्तर बढिरहेको रास्वपाको दाबी छ। “खुलेर लाग्ने सक्रिय सदस्य मात्रै हजारभन्दा माथि पुगिसकेका छन्। अझै धेरै आउने क्रममा हुनुहुन्छ,” सचिव सापकोटाले बताउनुभयो।
रास्वपाले अघि सारेको “निलो क्रान्ति” लाई स्थानीय तहसम्म पुर्याउने रणनीति अनुसार कार्यक्रम अघि बढिरहेको समितिको भनाइ छ। “आगामी दशैँसम्म दुधौलीमा रास्वपाको सक्रियता र प्रभाव अझै स्पष्ट रूपमा देखिनेछ,” नगर सचिव सापकोटाले विश्वास व्यक्त गर्नुभयो।
